Verruckti Ideeä entständ meischtens mitemnä Glas Biär oder Wyy i dr Hand. So ischs de ai am entsprächendä chaltä Abig im Jahr 1990 gsi. D’Fasnacht isch churz vor dr Tyyrä gstandä. Inerä gselligä Rundi isch diä fyyfti und scheenschti Jahreszyyt zur Sprach cho. D‘Idee, ä Guggämüsig ds gründä, het definitiv alli Awensendä begeischteret. Gesagt – getan!

Zur Gründigsversammlig hend sich am 6. April 1990 30 Mitglieder yygfundä. D'Gründigsversammlig het dr voreilig gwählti Namä „Spinnä-Guggä“ i „Riesbodäfäger“ abgänderet. Mitm gwähltä Namä hett mä wellä symbolisiärä, dass d'Guggämitglieder i verschiedenschtä Gmeindä im underä Ryysstal däheimä gsi sind. Das het sich im Übrigä i dä letschtä Jahrä niä g‘änderet.

Dr Start isch alles anderi als eifach wordä. Diä meischtä Mitglieder hend absoluts Niwland beträtä, da sie vorher nu niä äs Müsiginstrument i dr Händ gha hend. Nachdem mä uf dr Suächi nachemnä geignetä Probelokal ds Seedorf fündig wordä isch und d’Instrument agschafft gsi sind, het mä de mit dä Probä chennä afah. Ä erschtä Meilästei isch am 24. Januar 1991 gsetzt wordä. D‘ryyssboodäfääger sind mit 27 Personä nach Engelberg g‘reist, um ihri Fyyrtäifi abzhaltä.

Diä folgendä Jahr chenet als Beginn vomenä steilä Üfstieg bezeichnet wärdä. D’Gründigsmitglieder sind immer routiniärter wordä und im wyyterä sind immer wiedr Niwmitgliedr als Verstärchig am Verein byyträttä. Bi einigä isch de sogar ds müsikalischä Rüschtzyygs scho vorhandä gsi. Usserdem sind i vereinsinternä Üsbildigsgäng hoffnigsvolli Nachwuchsbläser „züchtet“ wordä. Das het de natirlich äi drzuä gfiährt, dass d’Zahl vo dä Mitglieder immer agstiegä isch und sich d‘Mitgliederzahl hit bi rund 35 Personä yypändlet het. Ds Sitzläder ischs gsi, wo d‘ryyssboodäfääger bekannt gmacht het, hit derf mä jedoch äi sägä, dass d‘ryyssboodäfääger nid nur dur ihri Fäschttauglichkeit, sondern äi mit guätem Sound überzyygä chenet. Ds Repertoire gaht vo Stimmigsliädr über Oldies und Schlager bis zu aktuellä Hitparadä-Stückli.

Dr enormi Zämähalt undr dä Guggämitgliedr isch jewils nid ds überseh. Ä ryyssboodäfääger trifft mä sältä ällei a, meischtens haltet är sich i dr Nechi vo sinä Guggägspändli üf. Falls iär also mal ämnä Rudel ryyssboodäfääger überä Wäg läifet, begriässet si doch mitemnä „einisch ä ryyssboodäfääger - immer ä ryyssboodäfääger“. Sie wärdets bestimmt mitemnä Lächlä vrdankä.

Meilensteine: